martes, 18 de mayo de 2021

PASANDU EL RATU



 Jasqui estoy sentau,

sentau pasandu un ratu,

viendu pasa sin prisa las joras,

pensandu y pensandu,

que rapio se ja pasao la via,

que cortu se me ja jecho el tramu.


Jaquí estoy sentau,

ya con ochenta jañus,

con la espalda encorba y arrinonau,

de tantu trabaja las tierras,

en otoñu, inviernu, primavera y en veranu,

pa lleva comia a la mesa, pa gana unos realis,

pa que lo mius no pasin lo que yo je pasau.


Jaquí estoy sentau,

mentras pasa algun paisanu,

con la tanquilidad que dan los pueblus,

con sus ratus buenus y malus,

le preguntu,

comu va la via, que tal los sembrau?.


Con la boina cala y en la boca un cigarru,

me cotentesta con cariñu miraundu,

todu va muy bien, todu va tirandu,

y si el tiempu quieri y lluevi comu otrus añus,

jabra buena cosecha y jabra peces en rius, y pantanus.


Jay aquellus tiempus dondi yo andaba moceandu,

cuandu las tierras eran monti llenus de zarzalis altus,

cuando jabia que jarranca las jara con el picu y la manus,

pa pone los olivus con esfuezu y sudo,

trabajabamus de sol a sol comu esclavus.


Jasquí estoy sentau,

sentau pasandu el ratu,

viendu pasa a los paisanus,

con la boina cala, con una rama de catañu,

esperandu a que me llami mi muje,

pa subi a cena y acostarnus.

viernes, 15 de enero de 2021

VIVI NU QUIERU

 


Aquellus dias compartiu,

aquellus bellus momentus,

a mi naie me los quita,

cuandu nos mirabamus en inviernu,

calentadunu al lau de la lumbri,

mentras se jacia el pucheru.


Aquellus dias compartius,

pegau mi cuerpu a su cuerpu,

abrazau sin palabras, dandunus un besu,

aun la recuerdu jay senta mirandu jacia el fuegu,

y diciendome mariu, mañana jai que compra picon pal braseru.


Aquellus dias compartius,

a mi naie me quita ya esu,

el sabor de sus labius,

el olor de su cuerpu,

una sonrisa en su cara,

los pequeñus momentus,

en los que me decia amor miu cuantu te quieru.


Aquellus dias compartius,

de sembra el guertu,

de recoge la cosecha para pasa el inviernu,

todu era felicida en aquellus momentus,

la sonrisa brotataba a carcaja de sus adentru,

la felicida llebaba cada rincon de nuestru universu.


Aquellus dias compartius,

de los que solu tengu el recuerdu,

pues se la llevu el veranu,

y me deju solu este inviernu,

aun recuerdu su manus acariciandu mi pelu,

aun recuerdu sus palabras jai senta juntu al fuegu.


Ya nu me queda na,

yo ya na quieru,

solu irme con mi muje,

pues na aquí tengu,

yo nu se vivi sin ella,

y vivi sin ella vivi nu quieru.

domingo, 11 de octubre de 2020

JURDES, JACHA, JIGOS, JIGUERAS


 








Si yo soy Extremeñu,

De jesus que no escribin con jache,

De jesus que escribin con J,

De un luga llenu magia y encantu,

Dondi el corazón es libri y dondi el corazón gobierna,

Donde jay más sonrisas que llantu,

Y Gentis de jalma pura, de jalma buena.


Si yo soy Extremeñu,

De jesus que no se asustan, de jesus no se quiebran,

Que no le temin al mal tiempu, jechu de trabajar la tierra,

Con las manus encallaas de jacer bancalis con piedras,

Pero siempri con una sonrisa en la cara para dársila a cualesquiera.


Si yo soy Extremeñu,

Con mi casa siempri abierta,

Para darli la bienvenia a todu aquel que quiera,

Pues en mi tierra no jay extrañus, ni existin las fronteras,

Es un lugar para descansu comu dicin en lus escritus,

Escritoris de renombri y también muchus poetas.


Si yo soy Extremeñu,

Dondi los arroyus llevan agua pura,

Dondi cada rincón tieni belleza,

Dondi vuelan y viven libris los animalis,

De juna mancomunidad dondi no existin cadenas,

Al norti de la provincia de Cáceris,

Que se llaman las Jurdes, que me corri por las venas.


Si yo soy Extremeñu,

De jesus que escribin jurdes, jacha, jigos, jigueras.

viernes, 9 de octubre de 2020

YA SE JAN MARCHAU LOS MOZUS

 




Ya se jan marchau los mozus,

ya no jai alegria en el pueblu,

la callis estan vacia y tristis,

el sol calienta ya muchu menu,

la mocitas no salin de casa,

y en la plaza grandi solu jai niñus y viejus.


Ya se jan marchau los mozus,

y el pueblu pareci desiertu,

la fuentis se jan secau esperandu el otoñu,

otru otoñu en blancu y negru,

quien va a trabaja las tierras,

quien jara los vancalis nuevus.


Ya se jan marchau los mozus,

jace el serviciu como si fuesi un destierru,

y el pueblu pareci una tumba, pareci que ejesta muertu,

comu si no viviera ja qui naie,

comu si lo jubiera maldeciu algun demoniu,

comu si lo jubiera mirau un tuertu.


Ya se jan marchau los muzus,

y las madris lloran por dentru,

estan jecha de jierro porque siempli sufierun,

quien traera ajora la leña, quien traera ajora el dineru,

quien rondara a las mozas, quien dara alegria al cuerpu.


Ya se jan marchau los mozus,

ya no jai alegria en el pueblu,

la callis estan vacia y tristis,

el sol calienta ya muchu menu,

la mocitas no salin de casa,

y en la plaza grandi solu jai niñus y viejus.


sábado, 4 de enero de 2020

JURDANU DE CUERPU ENTERU






Andi yo ondi andi,
y ondi andi yo quieru,
llevarti en mi corazón,
recorriendu el mundu enteru,
gritandu a lo cuatru vientus,
yo soy jurdanu señoris,
jurdanu de cuerpu enteru.

Andi yo ondi andi,
y ondi andi yo quieru,
naie me va a quita a mi de adentrus,
pue llevu clavau en mi alma,
el olo de la jara y el brezu,
la alegria de mi gentis,
y el verdor de los guertus.

Andi yo dondi andi,
y ondi andi yo quieru,
recodar aquellus dias,
que con el sudo de mi cuerpu,
trabajaba en los bancalis,
plantandu olivus y cerezus,
para vesti la montaña,
y jace mas bellu mi pueblu.

Andi yo ondi andi,
y ondi andi yo quieru,
pues si e de eleji una via,
la eliju viviendu en tu senu,
pues a mi naie a de alejarmi de ti,
a no se caminu del cenmenteriu.

Andi yo ondi andi,
y ondi andi yo quieru,
ser polvu de tu polvu,
ser piedra en tu lechu,
ser regatu que con agua clara suena,
ser jigera, ser catañu, ser robli y ser jelechu,
ser para siempri tu amor y tu pa mi mi amor primeru.

Andi yo ondi andi,
y ondi andi yo quieru,
grita con orgullu a los cuatru vientus,
yo soy jurdanu señoris,
jurdanu de cuerpu enteru.

viernes, 16 de noviembre de 2018

QUE CONTARTI AMIGU MIU




Que contarti amigu miu,
que contarti de estus tiempus,
pues la nochi se jaci fria,
y el machu lanu esta al acechu,
jai que se mu valienti,
pa recorre estus senderus,
entri la maleza, con lluvia y vientu.

Somus jombris de bien,
y con pelu en el pechu,
jemus naciu en la judes,
durus somus como el jierro,
peru estas nochis de inviernu,
le calan al mas duro el cuerpu.

Que contarti amigu miu,
que contarti de estus tiempu,
tengu las manus llenas de callos,
de trabaja los olivus y el guertu,
pa lleva a mi casa una perra chica,
pa mantene lo que tengu.

Que contarti amigu miu,
que contati de estus tiempus,
tengu la espalda encorba,
de carga con tantu pesu,
y estoy deseandu llega a mi casa,
pa calentarme un ratu al fuegu.

Es dura la via en la jurdes,
mas que en otrus pueblu,
pero yo soy feliz y dichosu,
no cambio por na estu,
aunqui la nochi este negra,
y siempri de un pocu de mieu.

Que contarti amigu miu,
que contarti de estus tiempus,
pues la nochi se jaci fria,
y el machu lanu esta al acechu,
jai que se mu valienti,
pa recorre estus senderus,
entri la maleza, con lluvia y vientu.

lunes, 22 de octubre de 2018

JURDANO



Yo je naciu jurdano y jurdano seguru me mueru,
no jai na mas bonitu en el mundu que senti lo que yo sientu,
y jaber naciu en esta tierra llena de belleza y de misteriu,
con aire puru en la cara, con el olor del tomillo, lavanda y el brezu,
y la alegria de mi genti viviendu en pa y contentus.

Yo je naciu jurdano y jurdano seguru me mueru,
yo na le pio a naie salvu vivi el momentu,
y solu le pio a Dios que me de muchus añus veniderus,
pa levantandumi cada mañana oservandu lo que oservu,
los pinus en las montañas, los olivus y los cerezus.

Yo je naciu jurdano y jurdano seguru me mueru,
y desde que era chicu me sientu orgullosu de ellu,
y me paseu por el mundu contandu de dondi vengu,
de una mancomunidad tan bonita, tan bonita comu el cielu,
sueño de soñadores, descansu pa el alma y el cuerpu.

Yo je naciu jurdano y jurdano seguru me mueru,
paseandu por tus caminus dandoli rienda suelta al pensamientu,
dejandumi lleva viendu comu pasa mi tiempu,
por estus lugaris que tambien pasarun mis abuelus,
con las manus encallas, lagrimas en la cara y el corazón abiertu.

Yo je naciu jurdano y jurdano seguru me mueru,
a ver quien es el valienti que me jace a mi renega de ellu,
no jai naie en este mundu que se atreva a jacerme esu,
pues no jai na mas bonitu que senti lo que yo sientu,
yo je naciu jurdano y jurdano seguru me mueru,
yo je naciu jurdano, comu mis paes, comu mi abuelus.