viernes, 16 de noviembre de 2018

QUE CONTARTI AMIGU MIU




Que contarti amigu miu,
que contarti de estus tiempus,
pues la nochi se jaci fria,
y el machu lanu esta al acechu,
jai que se mu valienti,
pa recorre estus senderus,
entri la maleza, con lluvia y vientu.

Somus jombris de bien,
y con pelu en el pechu,
jemus naciu en la judes,
durus somus como el jierro,
peru estas nochis de inviernu,
le calan al mas duro el cuerpu.

Que contarti amigu miu,
que contarti de estus tiempu,
tengu las manus llenas de callos,
de trabaja los olivus y el guertu,
pa lleva a mi casa una perra chica,
pa mantene lo que tengu.

Que contarti amigu miu,
que contati de estus tiempus,
tengu la espalda encorba,
de carga con tantu pesu,
y estoy deseandu llega a mi casa,
pa calentarme un ratu al fuegu.

Es dura la via en la jurdes,
mas que en otrus pueblu,
pero yo soy feliz y dichosu,
no cambio por na estu,
aunqui la nochi este negra,
y siempri de un pocu de mieu.

Que contarti amigu miu,
que contarti de estus tiempus,
pues la nochi se jaci fria,
y el machu lanu esta al acechu,
jai que se mu valienti,
pa recorre estus senderus,
entri la maleza, con lluvia y vientu.

lunes, 22 de octubre de 2018

JURDANO



Yo je naciu jurdano y jurdano seguru me mueru,
no jai na mas bonitu en el mundu que senti lo que yo sientu,
y jaber naciu en esta tierra llena de belleza y de misteriu,
con aire puru en la cara, con el olor del tomillo, lavanda y el brezu,
y la alegria de mi genti viviendu en pa y contentus.

Yo je naciu jurdano y jurdano seguru me mueru,
yo na le pio a naie salvu vivi el momentu,
y solu le pio a Dios que me de muchus añus veniderus,
pa levantandumi cada mañana oservandu lo que oservu,
los pinus en las montañas, los olivus y los cerezus.

Yo je naciu jurdano y jurdano seguru me mueru,
y desde que era chicu me sientu orgullosu de ellu,
y me paseu por el mundu contandu de dondi vengu,
de una mancomunidad tan bonita, tan bonita comu el cielu,
sueño de soñadores, descansu pa el alma y el cuerpu.

Yo je naciu jurdano y jurdano seguru me mueru,
paseandu por tus caminus dandoli rienda suelta al pensamientu,
dejandumi lleva viendu comu pasa mi tiempu,
por estus lugaris que tambien pasarun mis abuelus,
con las manus encallas, lagrimas en la cara y el corazón abiertu.

Yo je naciu jurdano y jurdano seguru me mueru,
a ver quien es el valienti que me jace a mi renega de ellu,
no jai naie en este mundu que se atreva a jacerme esu,
pues no jai na mas bonitu que senti lo que yo sientu,
yo je naciu jurdano y jurdano seguru me mueru,
yo je naciu jurdano, comu mis paes, comu mi abuelus.

AQUELLUS TIEMPUS



En ondi se jan quedau aquellus tiempus,
aquellus tiempus del pasau,
el burru capon y la cabra mocha,
el sachu y la cesta que me regalalun,
los juegus de aquellus dias,
y la niñez que se me ja escurriu entri la manus.

En ondi ja quedau la escuela,
los chaguarzus , la jaras y los regatus,
el olor a tierra moja, a tomillu y lavanda,
lo olivus, los ciruelus y los cerezus,
y las nochis con mieo al hombri del sacu.

En ondi se jan quedau los consejus de mi abuela,
el sobrau de la casa donde buscamos,
la chacina corga de las puntas de la vigas,
el fuegu con el pote y el agua pa lavarnos,
y los domingus de misa, y las señoras con rosario.

En ondi jan quedau las leyendas,
los cuentus que se contaban al lau de la lumbri,
los juegus del gua, el burru y el incarroma,
la risa a carcaja de los niñus en las callis,
y aquel olor de leña de la tahona.

En ondi se jan quedau aquellus tiempus,
aquellu tiempus del pasau,
en el ayer siendu para siempri eternus,
en mi memoria, mi nostargia y en mi piel,
y en cada uno de los momentus que recuerdu,
grabaus a fuegu lentu en mi sien.




sábado, 6 de octubre de 2018

JASTA MI ALMA





Cada dia va la moza a la madri del agua,
con su pelu negru y el barreñu con la ropa,
con la lavaera de maera y una sonrisa en la cara,
mentras yo la miru, ella me ignora y canta,
cancionis que a mi me gustan,
cancionis que me llegan y me enamoan el alma.

Cada dia va la moza a la madri del agua,
a lava la ropa en el arrollo pa llevarla limpia a casa,
mentras yo la miru atontao callendusime la baba,
pues no jai en mi pueblu moza mas forzua y mas brava,
que la jija de señor Pedru, lista, espabila y guapa.

Cada dia va la moza a la madri del agua,
y yo me sientu en el puenti jasta que ella acaba,
y la miru, y la miru, sin pode deja de mirarla,
pues mi corazon ya tiene dueña a ella la doy jasta mi alma,
que yo voy a pedirli a su padre la manu y jacerla pa siempri mi amada.

Cada dia va la moza a la madri del agua,
andando con gracia y salero, con arte y elegancia,
y yo la sigu de cerca, de cerca jasta su casa,
y a luegu ya se meti dentru jasta el dia de mañana,
que yo la esperare en el puenti, en el puenti de la madri del agua.

Cada dia va la moza a la madri del agua,
con su pelu negru y el barreñu con la ropa,
con la lavaera de maera y una sonrisa en la cara,
mentras yo la miru, ella me ignora y canta,
cancionis que a mi me gustan,
cancionis que me llegan y me enamoan el alma.

viernes, 31 de agosto de 2018

AQUELLAS TARDIS


Nunca jabiu na,
Comu aquellas tardis de inviernu,
Toos areedor de la lumbri,
Contandu jistorias de aquellus,
Que venían de otrus lugaris,
Ja visita nuestru pueblu.


Con la chacina colga,
Y la tinaja juntu al fuego,
El pote pa la bolsa de agua,
Escuchandu comu chisporrea el leñu,
El vientu sopla con fuerza afuera,
Golpeandu fuerti contra el alberu.

La tardi pasa lenta,
Comu si se congelara el tiempu,
La plaza grandi está desierta,
Estamus aún a lunes y jasta el juevis no jay puestus,
El pueblu está solitariu, comu si estuvisi muertu.

Dice de repenti mi pae, sin veni a cuentu,
Os acordais de los titiriterus,
De la volanderas grandís al lau del colegiu,
Del enfadu que se cogió Don Tomas el curanderu,
Cuandu quisu subí a su jijo y le dijon que no sin dineru.

Aquella tardi no jechamus unas risas,
No jay na comu aquellus tiempus,
Toos al reedor de la lumbri,
Con mi pae, mi mae, mi abuela y mi abuelu,
Estaba también mi tía Ladi y mi tío Carlo el churreru,
Aquellas tardis de matanza, aquellas tardis de inviernu.

miércoles, 8 de agosto de 2018

ARREJACETE PA CA


Arrejacete pa ca,
Pue la nochi vieni fría,
Vamus a contarnus las penas,
Vamus a contarnus las alegrias,
Y que la luna si se asoma nus encuentri,
Abrazaus comu siempri via mia.

En esta nochi de inviernu,
Y ya colgaa del techu la chacina,
Vieni a mi mentí el recuerdu,
El recuerdu de otrus dia,
Cuandu eramus mozus y yo te pretendía.

Recuerdu la cara de tu padri,
Cuandu tu manu le pedía,
Esa mirada sería y serena que too lo decía,
Y aquellas palabras que me diju,
Comu va a mantene a la jija mía,
Si tu jeris solu un tristi jornaleru,
Sin futuru, sin casa y sin una perra chica.

Nu tienis dondi caerti muertu,
Y yo le contesté mentras el esu me decia,
Yo me dejare el alma y la via mia,
La piel de mis mamus y la rrabailla,
Pa que na le falti a su Paca,
Y si usted consienti pa siempri, la Paca mia.

El vientu afuera sopla fuerti,
Y lluevi por lu que se oyi toavía,
Arrejacete pa ca que la nochi vieni fría,
Vamus a contarnus las penas,
Vamus a contarnus amor miu las alegrías.

sábado, 28 de julio de 2018

NOCHI NEGRA


Era una nochi negra,
Negra y con mu mala baba,
Llovia comu nunca jabia lloviu,
Y los regatus corrían comu si no jubiera mañana.

El cielu oscuru tronaba y se iluminaba,
Comu si fuera a caenus en cima de la cabeza,
Y al infiernu con el diablu nus llevara,
El mesmu que se flotaba las manus y se reía a carcajadas.

El vientu soplaba mu fuerti,
mentras el niñu lloraba en la cama,
Jabia mujeris con velas encendías,
Rezanduli a Dios y a la Cruz santa.

Ya Jaa llegau seguru el fin del mundu,
A las jurdis altas, medias y bajas,
Aquí nu se salva naie, se me ajogan jasta las cabras,
Ya tieni que está jasta el burru pegandu pataas en la cuadra.

La buharda grandi no puedi traga tanta agua,
Y dicin la vocis que gritan que se ja inundao la posaa,
Unus valientis jan saliu con jerramientas de sus casas,
Pa i a ayuda al posaderu a ve si pueen salvarla.

Llovía comu nunca jabia lloviu,
Comu si el mesmo universu se desplomara,
Llovía comu nunca jabia lloviu,
Y los regatus corrían comu si no juviesi un mañana.

lunes, 16 de julio de 2018

EL LAGAR JUNDIO (Basada en una historia real)



Jera una nochi negra,
Negra y con mu mala baba,
Llovia comu nunca jabia lloviu,
Y los regatus corrían comu si no jubiera mañana.

Bajaba el regatu de la tambolirera,
De un lau al otru rebosandu de agua,
Jaciendo un ruidu comu si del mesmo infiernu se tratara,
Llevandusi tou a su pasu sin que na lo parara.

José y dos jornalerus que en el laga trabajaban,
Ajenus a la desdicha que el destinu les preparaba,
Estaban moliendu las aceitunas para jace la masa,
Y asin saca el oro liquidu que de su corazón brotaba.

La pare de la presa se rezumaba y se curvaba,
Y un momentu sin previu avisu por el centru reventaba,
José saltó y subio por lo rulus antis que la corrienti lo arrastrara,
Y subió al tejau antis que este se derrunbara,
Salto a un guertu de al lao y asin su via salvaba.

A jotru compañeru el tejau lo enterraba,
Y a otru la corrienti cuatru kilometru lo arrastraba,
José dio el avisu, en el pueblu dio la alarma,
Bajarun tous corruendu y el perru del enterrau al lau de el ladraba.

Al día despues al otru compañeru encontraban,
Ya el jombre sin via al lau del guertu de la tía Juana,
Desde entocis el laga jundio lo llaman,
El laga jundio de una nochi nefasta.

Jera una nochi negra,
Negra y con mu mala baba,
Llovia comu nunca jabia lloviu,
Y los regatus corrían comu si no jubiera mañana.

sábado, 16 de junio de 2018

LOS CARNAVALIS (Dedicada a Nano Jimenez y a Jesus (El gallo)





Mia mae que ya vieni el tamborilero,
Con la flauta en la manu y el tambo colgau del cuerpu,
Tocandu cancionis popularis de antañu,
Y también mae, la rosa de los vientus.

Ya vieni mae Emilianu y detrá la jenti bailandu y riendu,
Jesu el gallu tocandu con arti las pieas,
Y cantandu cancionis de jistorias del pueblu,
Jistorias De la Cruz, la Cruz que se encontró en el puertu.

Ya son los carnavalis en Casa de Palomeru,
Los paisanus llenan las callis con miles de atuendus,
Con difracis antiguos y también de estus tiempus,
Jai jenti difrazaa de jerues, de piratas y jerrerus.

Ya se ja llenau la plaza grandi,
Ya llegan tous los mozus y mozitas del pueblu,
Jan puestu puestus de turronis, almendras y caramelus,
Una volandera grandi, unus cochis de choqui pequeñu,
Por veni ja venio to el mundu, ja venio jasta el jeladeru.

Mia mae que ya vieni el tamborilero,
Con la flauta en la manu y el tambo colgau del cuerpu,
Tocandu cancionis popularis de antañu,
Y también mae, la rosa de los vientus.

Ya vieni mae Emilianu y detrá la jenti bailandu y riendu,
Jesu el gallu tocandu con arti las pieas,
Y cantandu cancionis de jistorias del pueblu,
Jistorias De la Cruz, la Cruz que se encontró en el puertu.

viernes, 15 de junio de 2018

DOMINGU DE RAMUS


Joy me puestu la mua nueva,
la mua nueva que mi mujer me ja comprau en la plaza,
je sacau el traji de chaqueta y me je puestu jasta corbata,
je sacau los zapatus que me ja regalau mi jijo,
me je afeitao y me puestu un clave en la solapa.

Mi muje tambien se me ja puestu mu guapa,
con una falda negra y una brusa blanca,
se ja jechu un moñu en el pelu,
se ja pintau los labius y se ja pintau la cara,
y a mi me ja recordau al dia que nos casaban.


Ya tocan las campanas y jay que i a la iglesia,
llama el seño cura pa acudi a la misa,
ya pasau el boticariu y tambien el alcardi,
el maestru, el medico, el jerreru y la tia tomasa,
las beatas del pueblu y jasta el Angel de la guarda.

Joy es domingu, domingu de ramus,
y comu decia mi abuela si no estrenas na,
jay niño si no estrenas na, se te caen las manus,
ya tocan las campanas y jay que i a la iglesia,
con una rama de palmera o una de olivu,
pa da la bienvenia a Jesus y recibi la vendicion de to los santus.

Despues comu tous jai que i a celebrarlu,
a toma a la posada o a al bar la floris un buen vinu,
que joy naie va al trabaju en el pueblu,
que pa jesu es domingu, domingu de ramu.

domingo, 10 de junio de 2018

GUAÑINUS SALVAJIS (Dedicada a mi Padre y a mi tío Carlos)



Son las cincu de la mañana,
Y aún no a cantau el gallu,
Ya se va aclareandu el día,
Y se oyi jabra algunus paisanus,
Es la jora de coge ya los jabius,
Y de ir a trabaja al campu.

Ya je cogio la guadaña,
Y también la joc de manu,
Le je puestu la jarbarda a la besthia,
De abonu je cargau dos sacus,
Pa echarlus a unus olivus que ayer je labrau.

Va mi cuñao Calo conmigu,
Vamu subiendu el puertu del Gamu,
Joi nos toca ir más allá de traslasierra,
A guañali a Don Jesus dos praus,
Aquí van los guañinus salvajis,
aquí van guañinus riendu y cantandu.

Vamus los dos cantandu cancionis popularis,
La del calderu, la de los ricus y los pobris,
Cancionis que icen asina;
Y jesta mañana señoris comu cosa de costumbri,
Jai ma agujeritus tapaus que calderus en la lumbri.

Pasan la joras y el sol se poni en el altu,
Ya jemus echau el abonu y jemus guañau los praus,
El picu de la sierra de Santa Bárbara se ja puestu nubrau,
Parecí que va a jabe tormenta, qué va a llove en un ratu,
Jaunque Joi jace muchu caló comu cualquier día de veranu.

jueves, 31 de mayo de 2018

RAÍCES (Aquellus tiempus)






Andandu por esus montis,
esus montis que fuerun olvio,
entri pinus, jaras y zarzalis,
me deje el corazón míu,
caminandu por los lugaris,
dondi una vez jugue de niñu.

Aquellus añus de escuela,
de guas, incarroma y guerrillas,
de churro, media manga y mangu enteru,
joi se me clavan en el alma,
joi me invaden los recuerdus,
y van dejandumi resbala las lágrimas,
al pensar en aquellus tiempus.

Recuerdu las cabras de mi mae,
y la tardis con mi pae en el guertu,
saborandu aquellus tomatis de sabor tan buenu,
y la fresas silvestris que nacían al lao de los criaderus,
en aquellas tardis de veranu regandu los canterus.

Paseandu por los caminus entri olivus y cerezus,
visitandu los lagaris que dierun trabaju y dineru,
voy recordandu mi infancia jaora que me jagu vieju,
mentras algún paisanu se para a mi lau,
y hablamus los dos de aquellus momentus.

La tardi se vencí a la nochi,
mentras a la casa regresu,
la casa que fue de mis padris,
y que jantis fue de mi abuelus,
esa casa que cuandu yo falti,
será pa mis jijos que son mi jerederus.

Recuerdu aquellas tardis,
recuerdu aquellus momentus,
y añoru más que nunca el vivir,
el vivir de aquellus tiempus.

jueves, 24 de mayo de 2018

POR UN ATAJU



Andandu por un ataju,
Y dejandu atra mi tiempu,
Voy dirección al ocasu,
De mis añus veniderus,
Con las alforjas vacías,
Y escarcha en el Pelu.


La nochi ja salió fría,
Y la mañana ni te cuentu,
Las cunetas están blancas,
Y en las fuentes jai jielu,
Nadie ja conociu jamas,
Un inviernu tan duru y tan fieru.


Ya voy preparandu los jabios,
Y to las cosas que poseu,
Pa dejarle a mis jijos lo pocu que tengu,
La casa, la segureja , los sachus y el guertu,
Todu jasta mi via, todu menus dineru.


Joi encendio la lumbri,
Y me duelin to los guesus,
Je trabajau siempri comu un burru,
Jasta que me ja aguantau el cuerpu,
Y ya con ochenta añus no puedu move ni un deu.


De mi casa ya nu salgu,
Y sali yo la verdad nu quieru,
Porque si tengu que sali,
Seguru que sólu Jes pa mi entierru,
Con un traji jechu de pinu caminu del cementeriu.


Andandu por un ataju,
Y dejandu atra mi tiempu,
Voy dirección al ocasu,
De mis añus veniderus,
Con las alforjas vacías,
Y escarcha en el Pelu.





sábado, 12 de mayo de 2018

COMU YO TE QUIERU





Yo quieru casarmi contigu niña,
pa que me quieas comu yo te quieru,
juntamus todus nuestrus jabius,
las casas, los olivus y los guertus,
y si tu pae lo consienti jasta el alta yo te llevu.

Yo quieru casarmi contigu niña,
pa que me quieas comu yo te quieru,
pue de toas las rosas mas jermosas,
que jai repartia por el mundu enteru,
tu jeris la mas preciosa y con los coloris mas bellus.

Yo quieru casarmi contigu niña,
para que me quieas comu yo te quieru,
desdi el prime dia que mis ojus te vierun,
no jai pa mi ma mujer en la jurdes que tu,
y si tu no me acepta yo de pena me mueru.

Yo quieru casarmi contigu niña,
pa que me quieas comu yo te quieru,
pa jace una via juntus compartiendu el mesmo techu,
sin importarnus ya na, sin importarnus el tiempu.

Yo quieru casarmi contigu niña,
pa que me quieas comu yo te quieru,
juntamus todus nuestrus jabius,
las casas, los olivus y los guertus,
y si tu pae lo consienti jasta el alta yo te llevu.

sábado, 5 de mayo de 2018

LA COSECHA (Dedicada a los trabajadores del campo)





Ya se oyi el ecu de los tractoris,
y jaun no ja cantau el gallu,
se oyi jablar a la genti,
que se dirigi alegri al campu.

Es tiempu de cosecha,
dei a coge el frutu del árbu,
es tempora de aceituna,
de darli valo al trabaju.

Joi el día nus acompaña,
el sol brilla radianti en lo altu,
es una jermosa mañana,
con un cielu azul mu claru.

Ya los bancalis se llenan,
cantan y gritan los paisanus,
mentras se cuentan las banatas,
las sonrisas van aflorandu.

Niñu traite las alforjas,
que e jora de la comia,
vamus que el tiempu pasa,
y en el campu siempri jay prisa.

Cai la tardi en los olivus,
es jora de recoge los avius,
de carga tractoris y mulus,
y de regresa de nuevu al pueblu.


viernes, 4 de mayo de 2018

TRABAJAO DEL CAMPU





Con las manus encallaas,
y el gorru calau,
la alforja en la besthia,
caminandu va jacia su casa.

Ya se ja terminao el día,
y el trabaju mu bien jechu,
con el sachu al hombru,
sonrieti, feliz y satisfechu.

Asin vuelvi un trabajao del campu,
cuandu se ja terminao la peona,
de luchar contra la tierra,
y de quebrarsi la rabailla.

cuandu llega a su casa,
cuelga el sachu en la cuadra,
le quita a la besthia el seron y la albarda,
la llena el pesebri y la poni un cubu de agua.

Al subi a su casa lo espera comu siempri,
su muje en la cocina preparandu la cena,
el se da una ducha calienti,
y a luegu en la mesa ve a su hiju con una sonrisa en la cara.

Antis de dormi se poni a pensa,
mañana me toca labra,
ya tengu preparau el arau,
y el sacu de patatas.

Estus días me toca la siembra,
tengu que sembrar las patatas,tomatis, cebollas, calabazas y jabas,
aunqui son sábadu y domingu,
un trabajao del campu, jamas descansa.